أفضل طرق للمذاكرة

موضوع: أفضل طرق للمذاكرة 2011-10-22, 8:05 pm

للمذاكرة طريقتان :
1- طريقة رئيسية ( طريقة الألوان والمسح الشامل ) .
2- طريقتان ابتكاريتان تكميليتان ( الكومودينو + جسر الحمار )
وهذه الطرق ليست بديلة لبعضها البعض ولكنها مكملة لبعضها البعض بهدف السيطرة الكاملة على المعلومات بمجهود أقل ووقت أيسر .

1- المسح الشامل 1 : عن طريق قراءة المحاضرة بالكامل كقراءة الجرنال بدون تركيز أو محاولة للحفظ – يعنى مثلا المحاضرة المكونة من 30 صفحة تقرأ فى 10 دقائق . والغرض من هذا الجزء من الطريقة احداث ألفة بين القارىء والأوراق وهذا فى غاية الأهمية من الناحية النفسية .
2- مرحلة التلوين : عن طريق تلوين العناوين الرئيسية والفرعية وتحت الفرعية والكلمات الهامة فى بعض الفقرات . وهذه المرحلة تعرف الطالب بالإطار العام للمحاضرة وتعطية شىء من السيطرة على المحاضرة وفى نفس الوقت تضاعف الألفة بينه وبين الأوراق . وهذه المرحلة تستغرق حوالى 10 دقائق أيضا .
3- مرحلة الإستيعاب السريع : فى هذه المرحلة يقرأ الطالب المحاضرة ببطء نسبيا ولكن ليس معنى هذا أن يقرأ الصفحة فى ساعة أو حتى نصف ساعة ولكن تقريبا 4- 7 دقائق تقريبا للصفحة ( بعيدا عن السرحان أو تخيل ماوراء السطور ولو وصل الأمر الى تأجيل فهم بعض النقاط حيث أنه بالتقدم فى المنهج يفك غموض الأجزاء القديمة المجملة ) .
4- المسح الشامل 2 : مثل الخطوة رقم 1 تماما .
5- بعد ذلك تترك المحاضرة تماما . وبعد 4- 5 أيام تعمل مسح سريع مرة أخرى فى 10 دقائق وتكرره كل

عدة أيام
ملاحظات :
مدمنو الطريقة الكلاسيكية المستخدمة فى الثانوية العامة وهى طريقة " الحفظ التام أو الموت الزؤام " ومذاكرة الصفحة فى ساعة وعدم الإنتقال من الصفحة إلا بعد القضاء عليها حفظا - يظنون عدم جدوى طريقه التلوين والمسح الشامل ولكن يقول علماء النفس أن المعلومات التى يحصلها الإنسان ينساها خلال 10 أيام تقريبا حسب منحنى النسيان وهذا طبيعى عند كل البشر مهما كان مستوى حفظك لهذه المحاضرة .
ولكن طريقة التلوين والمسح الشامل توفر بقليل من المجهود والوقت الإحتفاظ بالمعلومة لوقت طويل جدا وتجديدها من خلال المسح الشامل وقد أثبتت الإحصائيات أن الطلاب والطالبات الذين يستعملون هذه الطريقة لا يقلون عن تقدير ممتاز خصوصا مع الكم الهائل من المعلومات الموجودة فى المحاضرات والمطلوب قراءتها كلها ليلة الإمتحان .
وحتى تغير طريقتك التقليدية الى هذه الطريقة لابد أن تتغير تدريجيا بتجربتها وتكرر وتصبر ولا تيأس حتى تتعود عليها وتصير أسلوب مذاكرة لديك .

طريقة الكومودينو :
تخصص هذه الطريقة التكميلية الإبتكارية للسيطرة على الرسومات ( مثل دورات الحياة فى علم الطفيليات ، وعلم الحيوان ورسومات النبات والعقاقير ورسومات التحليل الآلى والعقاقير التطبيقى مثل ال UV, IR ) وصور الأجهزة ( مثل أجهزة الصيدلانيات والصيدلة الصناعية والكروماتوجرافى فى العقاقير التطبيقى ) والصيغ الجزيئية للمركبات الكيميائية ( مثل الكيمياء العضوية والحيوية والفيتو والكيمياء الصيدلية ... الخ )

تتلخص هذه الطريقة فى إعداد مجموعة من الأوراق البيضاء ثم نرسم محتويات كل محاضرة من الصيغ الجزيئية للمركبات ( مثلا ) فى الورق ونضع كود لكل مركب وفى آخر ورقة نكتب مفتاح الحل ونضع هذا الورق على الكومودينو . وعند النوم بعد الإستعداد للنوم والإستلقاء فى وضع النوم ننظر نظرة عابرة فى الأوراق ونحاول التعرف على الصور ثم نراجع تخميننا بمفتاح الإجابة فى الورقة الأخيرة ثم بعد ذلك نروح فى ثبات عميق . ونكرر ذلك يوميا أو يوم بعد يوم . بعد عدة مرات تجد نفسك قد حفظت تلك الرسومات بشكل غير عادى .
ملحوظة : تعتمد هذه الطريقة على وقت ماقبل النوم حيث تكون الذاكرة والإستيعاب أعلى مايمكن ولو لم يتم بذل مجهود كبير فى التركيز كما يقول علماء النفس .

طريقة جسر الحمار :
تعالج هذه الطريقة ضعف حفظ العناصر الكثيرة عندما يطلب استظهارها
يعنى مثلا ما هى العوامل التى تؤثر على ظاهرة معينة ؟ وتكون الإجابة 25 نقطة – كيف تذكرها دون أن تغفل نقطة واحدة . ( مثل مادة الصيدلانيات والصحة العامة والصيدلة الصناعية والميكروبيولوجى والمعلومات الدوائية والعلاج الدوائى والفارماكولوجى والسموم )
تتلخص هذه الطريقة فى تحديد كلمات المفاتيح ( أى الكلمات المميزة ) فى كل عنصر . ثم أخذ الحرف الأول من كل كلمة من هذه الكلمات المفاتيح وتكوين جسر الحمار ( كلمة مميزة ذات معنى فكاهى أو مرتبطة بشىء مميز ) حيث يشير كل حرف لكلمة مفتاح وكل كلمة مفتاح توصل الى العنصر بكاملة

[ندعوك للتسجيل في المنتدى أو التعريف بنفسك لمعاينة هذا الرابط]

موضوع: رد: أفضل طرق للمذاكرة 2011-10-22, 10:54 pm

على اساس ان انا ممكن اعمل كدا

يا صلاة النبى

انا اشيلو و الفو وارمية على الارض

هههههههههههههههه

انا بذاكر بطريقة 5 3 2

احسن

موضوع: رد: أفضل طرق للمذاكرة 2011-10-22, 11:33 pm

ايوه على فكرة الكلام ده صح جدا ومية مية
عشان انا فعلا بعمل كده

انا على طول بقلب الصفح والمذاكرة مش بتكمل حاجة معايا

(ملحوظة هامة: اللى عايز يعرف انا بذاكر ازاى وشااطرة ازاى هو بس اللى يقرأ عشان انا هارغى كتير)

موضوع جسر الحمار بينفع جدااااااا
هههههههههه مع ان الاسم انا مستغرباه شوية
بس انا عملته ف الاليكترونك سيركت السنة الى فاتت
خصوصا ف قرايات المقاومات والمكثفات
كانت صعبة انك تحفظ الالوان بالارقام ودرجات التفاوت والحروف والحوارت دى
فكت بجمع كل حرف من اول كل حاجة واربطه باسم اغنية او اسم مغنى اجنبى انا بحبه
:D
صدق او لا تصدق دى الطريقة الوحيدة اللى نفعت معايا ف الاسيمنت
وانا من اول السنة كنت بقعد كل مرة اذاكر فيها المادة لازم اجيب من الاول واحفظ من اول وجديد
انما الطريقة دى بمجرد انى اقرأها مرة واحدة بس افتكرها على طول من غير ما اقعد احفظ من الاول

وانا احب اضيف حاجة تانية بردو بتنفع معايا
بالنسبة لموضوع الرسومات وموضوع القوانين او التعاريف
انا بيبقى معايا ورق المحاضرة الاصلى قدامى
ومعايا ورقة تانية فاضية
طبعا ورق المحاضرة بيبقى فيه رغى كتير اوووى
فانت بعد ما تقرا كله ع السريع وبعد كده ترجع تقرا كل حاجة لوحدها بالراحة
طبعا بيبقى فى كذا نقطة ف المحاضرة وتحتها رغى كتير كده فانت عشان تفتكر الرغى لازم تفتكر النقطة اللى الرغى ده بيحكى عنها
فانا ف الورقة الفاضية دى بجمع فيها النقط الرئيسية يعنى القوانين التعاريف كده

والرسومات نفس الحوار بردو بربط كل حاجة بالتانية
يعنى الرسمة عليها عشر بيانات مثلا بربط كل تلاتة ببعض بحيث انى بمجرد ما افتكر واحدة افتكر الاتنين الباقيين
واظبط الحاجات دى ف ورقة وف الاخر الورقة دى هى اللى اراجعها قبل الامتحان بدل ما اقعد افتح ورق المحاضرات واجيب من الاول

يعنى الفكرة كلها انك تربط كل حاجة ببعضها بحيث ان موضوع انك تفتكر ده يبقى بسيط
يعنى بمجرد انك تفتكر حاجة من الموضوع تفتكر الباقى
وهو ده اللى اسمه فهم بقا مش حفظ
الحفظ مفيش حاجة اسمها حاجة من غير حفظ كله فيه حفظ
انما حفظ عن حفظ يفرق
تقولى ازاى اقولك انا
فى انك تحفظ كل حاجة زى ما هى عندك ف الورق وتكررره كله ف الامتحان
وفى انك تحفظ نقط رئيسية وتفهم التفرعات بتاعتها
يعنى على اساس انك تقلل الحمل على الذاكرة بتاعتك عشان تستوعب اكتر
اما تفتكر نقط رئيسية ف حاجات كتيرة احسن من انك تفتكر رغى كتير ف حاجة واحدة
مش صح ولا ايه؟؟

للاسف بقا الطرق دى انا مش اكتشفتها الا وانا ف سنة تالتة اعدادى
ومن ساعتها وانا كده لحد ما اتعودت
انا الحمد لله بفضل طول الاسبوع مش بذاكر حاجة وباجى يوم الجمعة ده اقعد اربع ساعات متوااصلين بخلص فيهم كل حاجة
وبرجع بعد كده بخلص الحاجات الخفيفة يوم السبت اللى هى الحاجات اللى ممكن تتأجل

اها وفى حاجة مهمة جداااااا لازم تتعمل وانا لو مش عملتها مش بعرف اذاكر

انا اول حاجة اول ما انوى مذاكرة بجيب ورقة كده حلوة واكتب فيها كل المواد بتاعتى
واكتب كل مادة ايه اللى مطلوب منى اخلصه فيها
يعنى مثلا :
عربى : مذاكرة وحفظ نص كذا كذا - وواجب نحو - وتحضير درس بلاغة
انجليزى : حفظ كلمات اخر محاضرة - وحل الاسئلة رقم واحد واتنين وتلاتة
بالنظام ده بقا فى كل المواد
وبعدين اقسم انهو المهم وانهو اللى مش مهم يعنى مثلا عندى بكرة حصة الانجليزى يبقى الانجليزى اعمل جنبه رقم واحد
والعربى مش مهم اوى انهاردة اعمل جنبه رقم اتنين
وامشى ع النظام ده ف المذاكرة بقا واحد اتنين تلاتة ..
واللى اخلصه اشطب عليه

اخر حاجة بقا هاقول عليها
موضوع انك تجيب كل حاجاتك جنبك وتدخل اوضتك وتقفل عليك الباب
يعنى تجيب شنطة المدرسة بتاعتك بالاقلام بالكشاكيل بكله
والاله الحاسبة والورق الفاضى وكل الكتب وترصها جنبك كده
سواء هتقعد تذاكر على مكتب او على سرير
انا عن نفسى بحب اقعد ع السرير وافرش كل الكتب حواليا عشان احسس نفسى انى بذاكر فعلا
ههه

المهم الغرض من الحوار ده يعنى ان مش يبقى فى حجة انك تقوم من مذاكرتك
ومفيش مانع بين كل مادة ومادة انك مثلا تقوم تشرب حاجة او تاكل حاجة بحيث ان الدورة الدموية بتاعتك شغالة وتفضل مصحصح بس ده مش معناه تعمل قهوة وشاى وبيبسى وكلام من ده
لالالالالالالا ابعد بعيد عن الحاجات دى خالص
خليك ف العصاير والفاكهة والخضار والميا الساقعة بالذات خلى جنبك ازازة ميا حلوة كده اشرب منها كل شوية عشان الميا مفيدة جدا ف تنشيط الذاكرة
طبعا كذلك الحال بالنسبة للخضار والفاكهة

على فكرة ممكن يتهيأ لكم ان ده كله عقبال ما تعمله هيكون وقتك ضاع ومش هتذاكر حاجة
انما بالعكس الحاجة دى كلها مش بتكمل عشر دقايق وبعدين تسمى كده وتتوكل على الله وتبدأ بالنظام اللى شرحته امولة ده

سورى طولت ف الكلام بس انا قولت افيدكو يعنى بما اننا فتحنا الموضوع
يا ريت بردو كل واحد يقول هو بيذاكر ازاى يمكن يكون فى حاجة جديدة ولا بتاع

بيس

موضوع: رد: أفضل طرق للمذاكرة 2011-10-23, 1:49 am

والله كل الحجات دى انا بعملها

بس كل فين و فين

علشان بكون مكسل

فا عوز اللغى حكاية الكسل دة بجد علشان اعرف اتفوق زيادة

و متشكرين جدآ جدآ جدآ

على المعلومات من ابتسام و من امل

موضوع: رد: أفضل طرق للمذاكرة 2011-10-23, 7:28 pm

Very very Very nice and important information

موضوع: رد: أفضل طرق للمذاكرة 2011-10-23, 8:48 pm

اية الكلام الكتير دا انا مش فاهم حاجة منو خالص يا ابتسام انتى بتعملى كل دا

موضوع: رد: أفضل طرق للمذاكرة 2011-10-23, 9:00 pm

اها واللهى انا بعمل ده كله
وبيجيب نتيجة زى الفل
وحتى اسألوا الباشمهندسين عنى [ندعوك للتسجيل في المنتدى أو التعريف بنفسك لمعاينة هذه الصورة]

موضوع: رد: أفضل طرق للمذاكرة 2011-10-23, 9:50 pm

احنا عارفين طبعآ يا ابتسام

من غير ما نسأل

موضوع: رد: أفضل طرق للمذاكرة 2011-10-27, 9:07 am

يا ست اجررررررى ده كله بمجهوددددددددى

موضوع: رد: أفضل طرق للمذاكرة 2011-10-27, 5:18 pm

نعم يا حاجة؟؟؟؟
مش شايفة انتى كاتبة ايه ؟
وربنا اما اشوفك ف المجمع

موضوع: رد: أفضل طرق للمذاكرة 2011-10-27, 11:44 pm

ماتشوفيش وحش ياختى :p

موضوع: رد: أفضل طرق للمذاكرة 2011-10-28, 2:38 pm

هههههههههه
ماشى يا ام ضرس مكسور انتى
اجرى العبى بعيد بقا
ههههههه

موضوع: رد: أفضل طرق للمذاكرة 2011-11-17, 3:48 pm

من غير فقاقه يعنى ايه افضل طريقه لمذاكره؟
المهم انك تخترع طريقه تذاكر بيها يبقى افضل

موضوع: رد: أفضل طرق للمذاكرة 2011-11-17, 3:52 pm

المنتدى بقى غريب الى بيعيط والى بيفتى وبيحط اى حاجه فى اى حاجه والى كاتب المجتهد وبيقول هاى ممكن اتعرف والهبل ده ( cooking

) طبعاً مفهومه

موضوع: رد: أفضل طرق للمذاكرة 2011-11-17, 11:51 pm

معلش خليها عليك انت يا باشمهندس
الحلو ميكملش بردو ولاايه؟

موضوع: رد: أفضل طرق للمذاكرة 2011-11-18, 2:27 pm

Ebtsam Mohamed كتب:: معلش خليها عليك انت يا باشمهندس
الحلو ميكملش بردو ولاايه؟

عشان خاطرك بس يا باشمهندسه[ندعوك للتسجيل في المنتدى أو التعريف بنفسك لمعاينة هذه الصورة]

موضوع: رد: أفضل طرق للمذاكرة 2011-11-18, 3:41 pm

peace [ندعوك للتسجيل في المنتدى أو التعريف بنفسك لمعاينة هذه الصورة]

موضوع: رد: أفضل طرق للمذاكرة 2011-11-18, 6:22 pm

hassanhalawa كتب:: المنتدى بقى غريب الى بيعيط والى بيفتى وبيحط اى حاجه فى اى حاجه والى كاتب المجتهد وبيقول هاى ممكن اتعرف والهبل ده () طبعاً مفهومه

can i see you sunday in Complex